آخر تحديث :الخميس - 25 أبريل 2024 - 04:40 ص

سلمى الجبوتية

الأربعاء - 14 نوفمبر 2018 - الساعة 03:00 م

بقلم: سعاد خذابخش - ارشيف الكاتب

تابعونا على

صرخ سعيد في وجه سلمى الجبوتية : انت حرمة بلا حياء ومافيش معك رجال يأدبوك..
ردت بصوت عالي : احترم نفسك..
أصلا انت مش رجال تهنجم على حرمه..

تدخل احد الجيران موجها كلامه للحاج سعيد : خلاص ياحاج أغضب الشيطان وروح لك ما فيش داعي للمشاكل..
رد عليه : ها انا اللي أغضب الشيطان وهي لا ..هيا طير لك من قدامي قدك تسمعها تشتمنا وصوتها مليان الشارع وتقول لي اروح..دي تشتي كسر لقفها..
صاحت سلمى : يافدوبك فدا ما تقدر انت ولاعشرة زيك يامبعول يهزوا شعرة من رأسي والله بايقع لك بالشمبل يامبهدل

قال للجار : ذالحين سمعته والا بس تسمعنا انا..هيا كلمه بااشوفك يافصيح قال الجار : يا حجه سلمى خلاص اسألك بالله وقفي انتم جيران ما يستوي هذا اللي يحصل بينكم امانتك ادخلي وقفلي بابك..
ردت عليه : او مالك قلبت علي عامل معقله على الفاضي باتقول له هو يدخل بيته اما اني مااحد يقدر يدخلني لا انت ولاأكبر كبير يافضولي..

قال له الحاج سعيد : افتهن قلبك وسمعت اللحن الجميل حقها قد قلت لك تشتي كسر لقفه قمت تدافع عنها..

صاح الجار : جني شلكم سدوا انا ايش دخلنا بينكم يامجانين وتركهم ودخل بيته..

قالت سلمى : سمعت ايش قال هذا الاهبل ياسعيد نعم نحنا مجانين..
رد سعيد : قد قلت له لايتدخل..
قالت : اني بااشمت باابوه لما اشوفه هذا القليل حياء
قال سعيد : سوقي ابوه علشان يبطل الفضاله..

الحجة سلمى سألت سعيد قائلة : ويه شوف اليوم يوزعوا راشن في مدرسة البادري شل بطاقتك وبطاقة الحرمة وروح سجل..
ليش انت سجلتي ؟ قالت أيوه سجلني شيخ الغفلة وشل ألف ريال مني جني شله طول عمره هبار..
تقولي فين باالاقيه؟ سألها الحاج سعيد
ردت : باتلاقيه هناك عند الجواني مع اللجنة يشتري بطاقات الصرف من الناس لصالح تاجر صاحبة ويستلم عموله..
قال الحاج سعيد : كيف واللجنة ايش تقول ؟ ضحكت وردت : كلهم سرق ياحاج أنت عادك غشيم ماتفهم ..هيا روح بسرعة وسجل..

الحاج سعيد دخل بيته يدور على البطائق وزوجته تقول له : كيف سويت انت والمجنونه سلمى
رد عليها : مامجانين الا نحنا هيا هاتي بطاقتك بسرعة.

شل سعيد البطاقات وغادر سريعا الى مدرسة البادري وهناك لقى امة لا اله الا الله زحمة وعراك وصراخ ولكنه شق طريقه الى عند شيخ الحارة عيدروس بعدما تعرض للدكم واللكم والشتم وصل وقال له : جبت لك البطاقات حقنا هيا سجلنا..
رد عليه : انت بحسك والا مجنون ايش من تسجيل ذالحين؟ اليوم صرف فقط والتسجيل مافيش الآن روح عند المأمور يسجلك للمرة القادمة قال الحاج سعيد : كيف يعني انا مقلوص صرفتم للحافه كلها وانا لا ..
قال عيدروس : فينك من اول؟ اللجنة نزلت تسجل البيوت وانت ماهلكش..
قال له : انا ولا احد نزل عندي قدكم كلكم سرق هبارين..
رد عيدروس بعصبية: انتبه لاتغلط علينا واحترم نفسك..
سخر منه الحاج سعيد قائلا : والا ايش باتخندقه ؟ قدكم سرق عيال سرق وعاد إلى منزله حزينا ..

أثناء دخوله الحافه سمع صراخ سلمى الجبوتية : اصلكم بلا تربية واهلكم بلا احترام والا ماتسووا كذا وانت ياقاسم الدبه بااشوف ابوك هذا اللي ماعرف يربيك والا بااخرج ادعسك في الشارع..

وصل الحاج سعيد يصيح فوق ابنه : مالك انت ومن تتصايحوا ؟ رد عليه: سلمى تسب لنا من العصر..قال : على ايش؟ دخلت سلمى في الخط وقال : هيا قول لأبوك على ايش؟

قال لها : ايش استوى؟
قالت : كسروا الشبك حق الباب حقي بالكبة لهم ساعة ادبيج ادبيج واني اصيح وهم ولاتوقفوا دولا شياطين ربوا عيالكم زي الناس..

قال الحاج سعيد لأبنه شل الكبه حقك وادخل البيت مالقيت الا بيت سلمى الجبوتيه تلعب قدامه

قالت : كن عطر لقفك لما تذكرني عادك تتلاكع بدل ماتربي ابنك..
رد عليها بحرقة : انت تشتي زوج وباتبطلي الاذية جالسه فاضية ولاخليتي لأحد حاله ايش رأيك اتزوجك؟

سكتت وقالت له : عيب الكلام هذا أنت انسان كبير ومزوج..

قال : عادي الشرع حلل..
ضحكت وقالت :مالك حامي علي ايش مااعطوك راشن؟
قال : لا رفض عيدروس الجشع يصرف لي وقال في لجنة تنزل تسجل..

قالت بتودد : ابن اختي في اللجنة ولايهمك بااخليه يسجلكم..
رد عليها : تسلمي ياعاقله ودخل بيته..

وبمجرد ما دخل صاحت ام قاسم : باتتزوج الجبوتية ياسعيد ماتستحيش في الشارع تقول هذا الكلام.. قال : مله ضبحت بي وانت صدقتي فيسع والله انكم مجانين انت وسلمى..
قالت : مامجنون الا انت واعرفك باتسويها وباتتزوج بس لعلمك طلقني قبل الزواج والا مابايقع خير..

شد شعرة وصاح : جننتوا بي كفايه هي في الشارع وانت داخل البيت هيا البيت لكم وللجن..
قالت : قول كذا تدور عذر وباتروح تبيت عنده..

اغلق الباب بقوة وخرج وبينما هو في قمة غضبه سمع سلمى الجبوتية تقول : مالك دبجت الباب ايش في؟
رد : في ام الجن تشلك وتشلها ياشيخة اربخي وادخلي اطرحي ظهرك بدل الوقفة في الباب تقول ماسكة حراسة على الحافة..
قالت : حميت علي اني يامضربة هي شمتت بك واجيت تستقضي مني..

ضحك بهستيريا وقال : صحيح انا مضربة الحافة لكم وللجن انا بااهاجر جزر واق واق من بعدكم..
... هيا خاطركم .

✍ .سعاد خذابخش خان